Beynəlxalq Maliyyə Korporasiyası (BMK) korporativ idarəetmənin müasir standartlarının tətbiqinə texniki yardım proqramı (ACGP) çərçivəsində üçüncü pilot şirkəti seçib. Trend BMK-nın layihə qrupunun məlumatına istinadən xəbər verir ki, "Dəvəçi-broyler" açıq səhmdar cəmiyyəti də həmçinin texniki yardım alacaq.
Şirkət geniş proqramda iştirak edəcək və ona mövcud korporativ idarəetmə təcrübəsinin qiymətləndirilməsi üçün, bu sistemin təkmilləşdirilməsi üzrə xidmətlər göstəriləcək. Həmçinin korporativ sənədləri ən yaxşı təcrübələrə uyğunlaşdırmaq üçün onların yenidən baxılmasında, şəffaf və dolğun maliyyə hesabatlarının hazırlanmasında köməklik göstəriləcək.
BMK -nin öz seçiminin "Dəvəçi-broyler" ASC-nin üzərində saxlamağının səbəbi onun korporativ idarəetmədə təcrübənin təkmilləşdirilməsinə meylli olması ilə əlaqədardır. Şirkətin top-menecmenti ACGP layihəsinin seminarlarında iştirak edib və treninqlərlə yanaşı məsləhətlər də alıb. Həm də "Dəvəçi -broyler" BMK-nın açıq səhmdar cəmiyyətləri üçün hazırladığı və korporativ idarəetmənin yüksək standartlarını əks etdirən model nizamnaməsini qəbul etmiş ilk Azərbaycan şirkətidir.
2005-ci ilin oktyabr ayından etibarlı fəaliyyət göstərən korporativ idarəetmə layihəsi İqtisadi Əməkdaşlıq və İnkişaf Təşkilatınını (İƏİT) normalarına əsasən və İsveçrənin iqtisadi məsələlər üzrə Dövlət katibliyinin (Seco) maliyyə dəstəyi ilə korporativ idarəetmə standartlarının tətbiq edilməsinə yardım edir. 2006-cı ilin yanvar ayında ilk pilot şirkət Azəriqazbank seçilib, aprel ayından isə ikinci pilot şirkət "AZEL" SC seçilib. Məlumatda qeyd olunub ki, korporativ idarəetmə təcrübəsini təkmilləşdirmək istəyən bütün SC-lər pilot proqramında iştirak etmək üçün müraciət edə bilərlər.