"Məhbusların reablitasiyası haqqında" qanun layihəsinin hazırlanması ilə bağlı işçi qrupu yaradılıb. Trend xəbər verir ki, bu barədə Milli Məclisin sosial siyasət məsələləri daimi komissiyasının üzvü Elmira Axundova bildirib.
E.Axundova vurğulayıb ki, sənəd parlamentin payız sessiyasında müzakirəyə çıxarılacaq: "Sənəddə həbs edilən insanların normal həyata, cəmiyyətə qaytarılması üçün müəyyən müddəalar öz əksini tapıb. Nəinki azadlığa çıxandan sonra, eyni zamanda həbsdə olan vaxtı onların sosial reablitasiyası keçirilməlidir. Burada onların ailələri ilə görüşməsi məsələsi, fiziki və psixoloji cəhətdən hayata hazırlanması, iş yeri ilə təmin olunması və s. hallar nəzərdə tutulub".
Millət vəkili qeyd edib ki, bəzən məhbuslar azadlığa çıxandan sonra heç bir işlə təmin olunmurlar, ailələləri dağılır: "Belə hallar onlar üçün yox, bütövlükdə cəmiyyət üçün təhlükəlidir. Bu qanun qəbul edilsə belə hallar azalacaq". E.Axundova onu da vurğulayıb ki, keçmiş sovetlər vaxtında olduğu kimi məhbuslar üçün iş yerləri də aça bilərlər: "Bu ya Ədliyyə Nazirliyinin, rayon icra hakimiyyətlərinin nəzdində ola bilər. Hər bir rayon üzrə məhbuslarla iş üzrə sosial işçi ayrılmalıdır. Psixoloq və hüquqşünaslar öz rayonları üzrə olan məhbuslarla əlaqələr qura, onların problemlərinin həllinə çalışa bilərlər".
Millət vəkili xaricdə bu məsələyə böyük önəm verildiyini bildirib.