Xəzər dəniz gəmiçiliyinin sifarişi ilə Rusiyanın "Qırmızı Sormovo" gəmiqayırma zavodunda (Nijni Novqorod) inşa edilən "Dədə Qorqud" tankeri oktyabr ayının 11-12-də Bakıya gələcək. Bu barədə Trend ə Azərbaycan Dövlət Xəzər Dəniz Gəmiçiliyinin rəisi Aydın Bəşirov məlumat verilib. Bu, Xəzər dəniz gəmiçiliyinin 13 min ton dedveytli beşinci tankeridir. Gəmi "Prezident Heydər Əliyev" tankerinin layihəsi üzrə inşa edilib.
Bu, 2002-ci ilin oktyabr ayında imzalanmış müqavilə çərçivəsində zavod tərəfindən inşa edilmiş 19619 layihəsindən olan gəmidir. Əsas gəmi - "Prezident Heydər Əliyev" - 2004-cü ilin sentyabr ayında, "Babək" gəmisi - 2004-cü ilin noyabr ayında, üçüncü "Şah İsmayıl Xətai" gəmisi - ötən ilin oktyabr ayında, "Koroğlu" gəmisi- bu ilin avqust ayında sifarişçiyə təhvil verilib. Beşinci "Dədə Qorqud" tankeri 2006-cı il may ayının sonunda suya buraxılıb.
Bu layihədən olan tanker "çay-dəniz" sinfinə aiddir, on iki yük tankı və bir durulducu tankla təchiz olunub, gəminin ikiqat bortunda və ikiqat dibində ballast bölmə var. Uzunluğu - 152 m, eni - 17,30 m, bortun hündürlüyü - 10,5 m, suya oturma dərəcəsi - 6,99 m, tam yüklə hərəkət sürəti - 10 mildir. Tankerin 13 min tonluq dedveyti liman terminalları ilə təchiz edilmədən Xəzər dənizində sərbəst şəkildə istismar edilə bilən gəmi üçün maksimaldır.
Avqust ayında "Koroğlu" tankeri istismara verilib. Tankerin dəyəri 15 mln. 640 mindir.