Azərbaycan Maliyyə Nazirliyinin dəqiqləşdirilmiş məlumatına görə, 2006-cı ilin 9 ayı ərzində sığorta daxilolmalarının həcmi 2005-ci ilin anoloji dövrü ilə müqayisədə 7,95% azalaraq, 64,13 milyon manat təşkil edib. Bu haqda Trend -ə nazirlikdən məlumat verilib.
Daxilolmaların ümumi həcmindən 59,54 milyon manat sığortanın könüllü növlərinin payına düşür ki, bu da 8,99% azalıb. Diqqətəlayiq fakt odur ki, sığortanın könüllü növlərinin xüsusi çəkisi 93,9%-dən 92,85%-ə düşüb.
Sığortalamanın məcburi forması üzrə daxilolmalar 8% artaraq, 4,59 milyon manat təşkil edib. Xüsusi çəki 6,1%-dən 7,15%-ə qalxıb.
Üç rüb ərzində sıgorta ödəmələri 203,78 % artaraq 37 milyon manat təşkil edib. Sığortanın könüllü forması üzrə ödəmənin xüsusi çəkisi il ərzində 88,92%-dən 94,94%-ə qalxıb. Onların həcmi oktyabrın 1-nə 224,38 % artımla 35,13 milyon manat təşkil edib. Sığortalamanın məcburi formasının xüsusi çəkisi 11,08% -dən 5,06% -ə düşərək 2006-cı ilin 9 ayının nəticələrinə görə, 1,87 milyon manat təşkil edib. Məcburi ödəmələrin artımı 38,52% səviyyəsində olub.