Bu günlərdə Koreyanın Azərbaycandakı səfirliyinin xətti ilə səfirliyin ticarət, sənaye və energetika üzrə attaşesi Xoan Li Tokun başçılıq etdiyi Koreya nümayəndə heyətinin Naxçıvan Muxtar Respublikasının (NMR) daimi nümayəndəliyinin başçısı Rəşad Qulamovla görüşü olub. Bu barədə Trend ə NMR-in Bakıdakı daimi nümayəndəliyindən məlumat verilib.
Nümayəndəlikdə keçirilən görüşdə həmçinin Koreya Ehtiyatlar korporasiyasının beynəlxalq əməkdaşlıq qrupunun baş direktoru Yonq Qyon Park və həmin korporasiyanın beynəlxalq mineral planlaşdırma və koordinasiya qrupunun rəhbəri Kyon Ku Li iştirak edib.
Görüşün başlıca məqsədi muxtariyyatın molibden mədənlərində, o cümlədən Ordubad rayonunda yerləşən "Qapıcıq" mədənində kəşfiyyat işlərinin aparılma imkanlarının müzakirə edilməsidir.
"Kəşfiyyat işləri molibden yataqlarının ehtiyatlarının müəyyənləşdirilməsi üçün həyata keçiriləcək. Səmərəli ehtiyat həcmi aşkar olunduğu halda, Koreya tərəfi bu yataqların işlənməsinə sərmayə qoymaq niyyətindədir", - deyə nümayəndəlikdən bildirilib.