Azərbaycan,Bakı/müxbir Trend S.Babayeva/ Azərbaycan Kənd Təssərrüfatı Nazirliyinin elmi-aqrar mərkəzinin baş direktoru Əsəd Musayev kənd təsərrüfatı sahəsində beynəlxalq araşdırmalar üzrə məsləhət qrupunun (CGIAR- The Consultative Group on International Agricultural Research) illik iclasında iştirak edəcək. Cümə günü mərkəzdən verilən məlumata əsasən, tədbir 29-31 may tarixində Düşənbədə keçiriləcək.
Görüşdə Musayev keçən il Azərbaycanda aparılmış kənd təsərrüfatı üzrə elmi araşdırmalarla bağlı məruzə ilə çıxış edəcək.
Kənd təsərrüfatı sahəsində beynəlxalq araşdırmalar üzrə məsləhət qrupu ölkə, beynəlxalq və regional təşkilatlar və özəl fondların strateji alyansıdır. Alyansın himayəsində kənd təsərrüfatı araşdırmaları üzrə 15 beynəlxalq mərkəz fəaliyyət göstərir. Mərkəzlər kənd təsərrüfatı elmi-araşdırma müəssisələri, özəl sektor və vətəndaş cəmiyyətləri ilə əməkdaşlıq edir. Bu alyans yoxsulluğun azaldılması üçün kənd təsərrüfatı sahəsində elmi araşdırmalar aparır, əhalinin rifahının yüksəldilməsi təşəbbüsü, kənd təsərrüfatı və ətraf mühtin mühafizəsi sahəsinin inkişafını stimullaşdırır.
CGIAR 1971-ci ildə yaradılıb. Bu gün 8500-dən çox alim və digər əməkdaşlardan ibarət qruplar dünyanın 100-dən çox ölkəsində işləyir. Araşdırmalar kənd təsərrüfatı fəaliyyətinin bütün mühüm komponent və aspektlərini, həmçinin aqromeşəmeliorasiya, biomüxtəlifliyin saxlanması, ərzaq və yem bitkilərinin becərilməsi, ağac tədarükü, ətraf mühit üçün təhlükəsiz olan kənd təsərrüfatı istehsalı metodlarının tətbiqi, balıqçılıq, meşə təsərrüfatı, heyvandarlıq, ərzaq siyasəti və kənd təsərrüfatı biliklərinin yayılması sahələrini əhatə edir.
Kənd təsərrüfatı sahəsində beynəlxalq araşdırmalar üzrə məsləhət qrupunun 15 mərkəzinin 13-ü inkişaf etməkdə olan ölkələrdə yerləşir. Onların 60-dan çox üzvü və yüzlərlə əməkdaş təşkilatı var.
