Azərbaycan, Bakı / Trend müxbir K.Zərbalıyeva/ Respublikada "Piyada" şərti adı altında yol hərəkəti təhlükəsizliyi aylığı keçiriləcək. Respublika Baş Dövlət Yol Polisi İdarəsindən çərşənbə axşamı Trend ə verilən məlumata görə, aylıq iyunun 15-dən iyulun 15-dək davam edəcək. Aylıq piyadalar arasında intizamın möhkəmləndirilməsi sahəsində tədbirlərin səmərəsinin artırılması məqsədi daşıyır.
İdarədən bildirilib ki, son vaxtlar piyadalarla bağlı baş verən qəzalar artıb. Təkcə bu ilin 5 ayı ərzində piyadaların vurulması ilə bağlı 508 yol-nəqliyyat hadisəsi qeydə alınıb, nəticədə 145 nəfər həlak olub, 398 nəfər yaralanıb. Bu hadisələr ümumilikdə ölkədə baş verən yol-nəqliyyat hadisələrinin 48,6, Bakı şəhərində isə 56 faizini təşkil edir.
Dövlət Yol Polisi İdarəsi aylıq ərzində bütün hərəkət iştirakçılarını intizamlı olmağa və yol hərəkəti qaydalarına ciddi riayət etməyə çağırır.