Azərbaycan, Gəncə / Trend müxbir V.Məmmədov/ Gəncə şəhəri üzrə iyun ayında istifadə olunan elektrik enerjisinin 70,3%-nin pulu ödənilib. Bu barədə cümə günü Gəncə Elektrik Şəbəkəsinin informasiya şöbəsinin əməkdaşı Rafiq Abbasov məlumat verib. Onun sözlərinə görə, ötən ay ərzində Gəncə şəhəri üzrə ümumilikdə 24 milyon 647 min 740 kilovatt saat enerji sərf olunub ki, bunun da ümumi dəyəri 1 milyon 395 min 743 AZN-dir. Abbasov əlavə edib ki, bu məbləğdən yalnız 981 549 AZN yığılıb. Şəbəkə rəsmisinin bildirdiyinə görə, iyun ayında əhali sektoruna ümumilikdə 7 milyon 829 min 635 kilovatt saat enerji verilib və bunu da yalınız 81,9%-nin pulu ödənilib. Beləliklə əhali sektorunda ötən ay ərzində 469 778 manat vəsait toplanılıb.
Abbasov qeyd edib ki, ötən ay ərzində elektrik enerjisinin oğurlanması və ya sayğaca müdaxilə ilə bağlı 113 akt tərtib olunub. Yoxlamalar nəticəsində məlum olub ki, 681 100 kilovatt saat enerji oğurlanıb ki, bunun dəyəri 34 350 AZN-dir.
Gəncə paytaxt Bakıdan 365 kilometr qərbdə yerləşir.
