Azərbaycan, Bakı / Trend , müxbir İ.Xəlilova / "Aqrar-kredit" qeyri-bank kredit təşkilatının bazasında aqrar maliyyələşmə bankının yaradılması prosesi "Aqrar-kredit"in maliyyə-təsərrüfat fəaliyyətinin beynəlxalq auditinin başa çatmasından sonra aktivləşəcək. Kredit təşkilatından verilən məlumata görə, audit KPMG şirkəti tərəfindən 2005-2006-cı illərdə həyata keçirilən fəaliyyət üzrə aparlır.
Daha sonra səhmdarların illik yığıncağı keçiriləcək ki, burada kredit təşkilatının gəlirlərinin bölüşdürülməsi məsələsi müzakirə olunacaq. "Aqrar-kredit"in gəlirləri ötən il 2005-ci ilin 149 min manat göstəricisi ilə müqayisədə 1 mln. manat təşkil edib. "Aqrar-kredit"in inkişaf strategiyasına uyğun olaraq bu ilin yekunlarına əsasən 1,3 mln. manat səviyyəsində gəlir əldə etmək gözlənilir.
Kredit təşkilatının banka çevrilməsi məsələsinə gəldikdə isə "Aqrar-kredit"in əsas səhmdarı olan Maliyyə Nazirliyi artıq Milli Banka müraciət edib. Hazırda kredit təşkilatı məhdud lisenziya əsasında fəaliyyət göstərir, lakin gözlənilən dəyişikliklərlə əlaqədar olaraq tam bank fəaliyyətinə razılıq verilməsi nəzərdə tutulur.
"Aqrar-kredit"in banka çevrilməsi və gələcəkdə isə özəlləşdirilməsi nəzərdə tutulur. "2007-ci ilin dövlət büdcəsi haqqında" qanunun icrasının təsdiqi ilə bağlı prezident fərmanında Maliyyə Nazirliyinə AMB ilə birlikdə iki ay ərzində aqrar sektorun maliyyələşməsi və kreditləşməsi üzrə mexanizmlərin təkmilləşdirilməsi ilə bağlı təkliflər hazırlamaq tapşırılıb. Təkliflərdə kənd təsərrüfatının maliyyələşməsi üzrə bankın yaradılması ilə bağlı təkliflər də yer almalı idi. Əvvəllər AMB-nin rəhbəri Elman Rüstəmovun verdiyi məlumata görə, aqrar bank dövlət müəssisəsi olmamalıdır, lakin burada dövlət də iştirak etməlidir. Bununla əlaqədar olaraq AMB digər ölkələrdəki analoji modelləri öyrənir.
2007-ci ilin əvvəlindən başlayaraq Avropa Komissiyası "Aqrar-kredit"ə tam bank lisenziyası almasına, gələcəkdə isə özəlləşdirmə üçün açıq olmasına hazır olması məqsədilə texniki yardım göstərməyə başlayıb. Avropa Birliyi ilə razılığa əsasən 2008-ci ilin sonuna qədər "Aqrar-kredit"in özəlləşdirilməsinin ilkin qrafiki müəyyən olunub. Təşkilatın banka çevrilməsinin tarixi təyin olunmayıb.
Avropa Birliyi həmçinin AYİB ilə danşıqlara yardım göstərir. Bununla əlaqədar olaraq hətta kredit təşkilatının rəhbərliyi ilə Avropa Bankının nümayəndələrinin görüşü təşkil olunub, lakin yekun qərarın hökumət tərəfindən veriləcəyi gözlənilir və "Aqrar-kredit"in özəlləşdirilməsinin başlanması dövlətdən asılıdır.
"Aqrar-kredit"in əsas səhmdarları Azərbaycanın Maliyyə Nazirliyidir ki, kredit təşkilatının səhmlərinin 99,9%-nə malikdir, səhmlərin qalan hissəsi isə bərabər şəkildə "Azərsığorta" dövlət müəssisəsi və "Meliorasiya və su təsərrüfatı" ASC arasında bölünüb.