Azərbaycan, Bakı / Trend , müxbir İ.Xəlilova / Azərbaycanda dəyəri $500 mln. olan yol layihələri üçün multitranş paketi ilə bağlı Azərbaycan hökuməti və Asiya İnkişaf Bankı (AİB) arasında danışıqlar praktiki olaraq başa çatıb. Bu barədə bankın nümayəndəliyində məlumat veriblər. Gələn həftə Asiya Bankı Direktorlar Şurasının iclasında avtomobil magistralının bir hissəsinin yenidən qurulması layihəsi və multitranş paketi üzrə kredit müqaviləsinin tarixləri ilə bağlı konkret qərar verəcək.
"Güman etmək olar ki, Direktorlar Şurasının iclası sentyabrın sonunda keçiriləcək" - deyə nümayəndəlikdə vurğulayıblar. Əvvəllər bu tarix avqustun 28-nə planlaşdırılırdı. Burada nəzərə alınırdı ki, danışıqlar avqustun 9-dək başa çatmalı idi. Lakin texniki cəhətdən bu mümkün olmayıb.
MFF çərçivəsində Asiya Bankı Azərbaycana $500 mln. ayırmaq niyyətindədir. Bu vəsait Masallı-Astara avtomobil magistralının bir hissəsinin yenidən qurulması daxil olmaqla üç yol layihəsinin maliyyələşməsi üçün nəzərdə tutulur. Bu gün yalnız bir layihə razılaşdırılıb və onun reallaşması üçün Asiya Bankı $200 mln. ayıracaq.
