Azərbaycan, Bakı, 07 iyun/ Trend / Azərbaycan Dövlət Neft Şirkəti (ARDNŞ) aprel-may aylarında Gürcüstana təqribən 52,8 mln. kub metr qaz ixrac edib. Bu barədə ARDNŞ-dan məlumat veriblər. Mayda ixrac həcmi təqribən 40,5 mln. kub metr qaz təşkil edib. Gürcüstana qaz tədarükü apreldə başlayıb.
Gürcüstana sutkada 1,2-1,5 mln. kub metr qaz tədarük olunur. 2007-ci ildə Azərbaycan qazı Gürcüstana hər 1 min kub metrinə görə $120 qiyməti üzrə tədarük edib. Bu il qazın qiyməti artırılıb, lakin yeni qiymət açıqlanmır. Azərbaycan Dövlət Neft Şirkəti özünün işlədiyi yataqlardan hasil edilən şəxsi qaza malikdir.
Azərbaycan Dövlət Neft Şirkəti fevral-martda İrana 30 mln. kub metr şəxsi qazını tədarük edib. Tədarük "Azəriqaz" QSC-nin boru kəmərləri ilə həyata keçirilir. İrana qaz hər 1 min kub metrinə görə $300 dollarla tədarük edilib.
Azərbaycan və İranı 1474,5 km uzunluğunda Qazıməhəmməd-Astara-Bind-Biand qaz kəməri bağlayır. Onun Azərbaycan ərazisindən keçən hissəsinin uzunluğu 296,5 kilometrdir. Kəmərin ötürmə gücü ildə 10 mlrd. kub metrdir. Bu marşrut 1971-ci ildə istismara verilmiş Qazax-Astara-İran boru kəmərinin bir qoludur. Onun trassında - Qazıməhəmməd, Ağdaş və Qazaxda üç kompressor stansiyası tikilib. Qaz nəqli sistemi 55 atm. təzyiqə hesablanıb. Boru kəmərinin diametri 1200 mm.-dir.
