Azərbaycan, Bakı, 17 iyun/ Trend , müxbir E.İsmayılov/ Yayın sonunadək İmişli-Parsabad elektrik ötürücü xəttinin tikintisi başa çatacaq. Bu, İran və Azərbaycan arasında elektrik enerjisi mübadiləsini artırmağa imkan verəcək. Bu barədə çərşənbə axşamı Azərbaycanın sənaye və energetika naziri Natiq Əliyev məlumat verib.
Birinci faza çərçivəsində İmişlidə elektrik yarımstansiyasının yenidən qurulmasını başa çatdırmaq da planlaşdırılır.
"Biz bu layihəni yüksək qiymətləndiririk; bu layihə ölkələrimiz arasında elektrik enerjisi mübadiləsini artıracaq", - Əliyev söyləyib.
Bu layihə üç fazada reallaşdırılır. Birinci faza 45-50 gün ərzində, ikinci faza sentyabrın sonunda-oktyabrın əvvəlində başa çatacaq. İlin sonunadək layihə üzrə bütün işləri başa çatdırmaq planlaşdırılır.
Bu layihənin reallaşdırılması ölkələr arasında enerji mübadiləsini hazırki 200 MVt-dən 700 MVt-dək artırmağa imkan verəcək.
Bu layihənin başa çatması Naxçıvan Muxtar Respublikasına 150 MVt-dək, ümumilikdə isə, qış mövsümündə Azərbaycanın enerji sisteminə 400 MVt elektrik enerjisi tədarük etməyə imkan verəcək.
Proqram İranın "Sunir şirkəti" ilə birgə realizə edilir. Proqrama 330 kilovoltluq Əli Bayramlı İES - İmişli EÖX-in, İmişi-Parsabadın ikinci xəttinin, 220 kilovoltluq Əli Bayramlı İES - Salyan, Salyan - Masallı, Masallı - Astara EÖX-in, həmçinin "Salyan" yarımstansiyasının tikintisi və daha dörd yarımstansiyanın genişləndirilməsi daxildir. EÖX-in ümumi uzunluğu 350 km təşkil edəcək.
Müəlliflə əlaqə saxlamaq üçün elektron ünvan: [email protected]
