Azərbaycan, Bakı, 26 dekabr/ Trend , müxbir E.İsmayılov/ Ekol Mühəndislik Xidmətləri QSC və Salyan Oil əməliyyat şirkəti Azərbaycanda quruda "Kürsəngi" və "Qarabağlı" yataqlarında mədən sahələrinin karbohidrogen qazma şlamından təmizlənməsi üzrə müqavilə imzalayıblar, - QSC-nin rəsmi saytında yerləşdirilmiş məlumatda deyilir.
İlkin təqdiqatlara görə, quruda yerləşən bu iri neft blokunun mədən sahələrində təxminən 40 min kubmetr şlam yığılıb. Layihənin realizəsi yanvarın 5-dən başlayacaq və 2009-cu ilin sonuna başa çatacaq. Meydançalarda ekoloji monitorinq aparıldıqdan sonra layihə-smeta sənədləşdirməsinin hazırlanması başlayacaq.
Bu layihənin realizəsinin əsas məqsədi sahələrin ekoloji vəziyyətinin yaxşılaşdırılması, beynəlxalq maliyyə böhranı şəraitində müəssisənin iqtisadi imkanlarının artırılmasıdır.
2006-cı il martın 1-də, Abşeron yarımadasında mövcud ekoloji problemlərin həlli üüçn yaradılan Ekol Mühəndislik Xidmətləri QSC-nin təsisçiləri SOCAR (51 faiz) və Lancer S.A. Services (49 faiz) şirkətləridir.
"Kürsəngi-Qarabağlı" müqavilə sahəsini işləyən Salyan Oil şirkəti 2009-cu ildə yataqlarda dörd istismar quyusu qazmağı planlaşdırır. 2008-ci ildə əməliyyat şirkəti dərinliyi təxminən 3500 - 4000 metr olan altı istismar quyusu qazıb.
"Kürsəngi-Qarabağlı" yataqlarının işlənilməsinə dair sazişin müddəti 25 ildir. Layihənin səhmdarları aşağıdakılardır: SOCAR - 50 faiz, hər birinin 25 faiz iştirak payı olan iki Çin şirkəti China National Oil & Gas Exploration and Development Corp. (CNODC) və CNPC (Hong Kong) Ltd. (CNPCHK).
"Kürsəngi-Qarabağlı" yataqlarının ehtiyatı 18 mln. ton qiymətləndirilir.
Müəlliflə əlaqə saxlamaq üçün elektron ünvan: [email protected]
