Azərbaycan, Bakı, 05 mart / Trend /
Yanvar-fevralda SOCAR şirkəti (Azərbaycan Dövlət Neft Şirkəti) Bakı-Tbilisi-Ceyhan (BTC) boru kəməri ilə 2008-ci ilin analoji dövründə qeydə alınan 2,3 mln. tona nisbətdə 4 mln. tondan çox neft ixrac edib. Bu barədə SOCAR-ın Marketinq və İqtisadi Əməliyyatlar İdarəsinin məlumatında bildirilir.
2008-ci ildə SOCAR BTC üzrə təqribən 20,5 mln. ton neft ixrac edib. Bu göstərci 2007-ci ildə 6,5 mln. tona bərabər olub. 2006-cı ildə boru kəməri ilə 1,403 mln. ton neft ixrac olunub (bu marşrut üzrə ixrac 2006-cı ilin mayında başlanıb).
Bakı-Tbilisi-Ceyhan boru kəməri ilə "Azəri-Çıraq-Günəşli" yataqları blokundan çıxarılan yüngül Azərbaycan nefti və "Şahdəniz" yatağından hasil edilən kondensat ixrac olunur. Boru kəmərinin maksimal layihə nəql gücü 1 mln. barel neftdir, lakin BTC-nin nəql imkanlarının sutkada 1,2 mln. barelədək artırılması üzrə işlər bu yaxınlarda başa çatdırılıb.
Neft bu boru kəməri ilə Azərbaycan, Gürcüstan və Türkiyə ərazilərindən keçməklə Türkiyənin Aralıq dənizi Ceyhan limanına çatdırılır.
Neft kəmərinin operatoru BP şirkətidir. "BTC Co"nun səhmdarları: BP (30,1 faiz); AzBTC (25 faiz); Chevron (8,9 faiz); StatoilHydro (8,71 faiz); TRAO (6,53 faiz); Eni (5 faiz); Total (5 faiz); Itochu (3,40 faiz); Inpex (2,5 faiz); ConocoPhillips (2,50 faiz) və Hess (2,36 faiz).