Qazaxıstan, Astana, 24 mart / Trend , müxbir K.Arınova /
Layihəyə yaxın olan mənbənin Astanadan Trend -a verdiyi məlumata əsasən, "KazMunayQaz", SOCAR, Şimali Xəzər (Kaşaqan) layihəsi üzrə səhmdarlar və Tenqiz qrupu ("Şevron Limited" və "GksonMobil Qazaxıstan Vençur İnk." ) arasında "Nəqliyyat üzrə Qazaxıstan Xəzər Sistemi" (NQXS) layihəsi üzrə sənəd 2009-cu ilin ikinci yarısında imzalana bilər.
"Bütün suallara aydınlıq gətirməkdən ötrü NQXS layihəsində maraqlı olan, yük nəql edənlərlə daha bir danışıqlar raundu keçirməliyik. Danışıqlar Bakıda, Astanada və Londonda keçiriləcək", - məlumatı verən mənbə bildirib.
Məlumata əsasən, NQXS üzrə danışıqların ilk raundu Londonda artıq başa çatıb. "Danışıqlar iş rejimində keçirilir. Maraqlı olan iştirakçılar şərtlərimizi dəyərləndirirlər. Biz isə KMQ və SOCAR olaraq onların imkanlarını və şərtlərini nəzərdən keçiririk", - mənbə deyib.
Mənbənin sözlərinə görə, Qazaxıstanın və Azərbaycanın milli şirkətləri ilə maraqlanan tərəflər arasında imzalanacaq NQXS layihəsi üzrə sənədin necə adlanacağı dəqiq məlum deyil.
2007-ci ilin yanvar ayında Qazaxıstanın "KazMunayQaz" şirkəti ilə Şimali Xəzər layihəsi şirkətləri və Tenqiz qrupu arasında NQXS layihəsinin əsas prinsipləri ilə bağlı qarşılıqlı anlaşma barədə memorandum imzalanıb.
Nəqliyyat üzrə Qazaxıstan Xəzər Sistemi əsasən Kaşaqan və Tenqiz yataqlarından əldə olunan Qazaxıstan neftinin Xəzər dənizi vasitəsi ilə dünya bazarına nəqlini nəzərdə tutur. NQXS çərçivəsində Eskene-Kurık boru kəmərinin, Xəzərin Qazaxıstan sahilində yerləşən nefttökmə terminallarından və Azərbaycan sahilində tanker, gəmi, neftdoldurma terminallarından ibarət Transxəzər sisteminin və "Bakı-Tbilisi-Ceyhan" boru kəməri ilə billəşdirici qurğuların yaradılması nəzərdə tutulur.
NQXS-in ilkin mərhələdə 25 mln. ton neft nəql edəcəyi planlaşdırılır. Gələcəkdə isə bu rəqəmin 38 mln. tona çatacağı nəzərdə tutulub.
Məqalə müəllifi ilə əlaqə ünvanı: [email protected]
