Azərbaycan, Bakı, 17 iyul / Trend , müxbir A.Bədəlova /
OPEK-in proqnozlarına görə, dünyada neft tələbatı 2009-cu ilin üçüncü rübündə sutkada bir milyon barelə kimi düşəcək. OPEK-in qiymətləndirməsinə əsasən, ikinci rübdə tələbat sutkada 2,5 milyon barel azalıb.
2009-cu ildə ümumdünya neft tələbatına olan proqnozlar dəyişmədən sutkada 83,84 milyon barel təşkil edib ki, bu da 2008-ci ilə nisbətən sutkada 1,6 milyon barel azdır.
OPEK-in neft bazarı üzrə iyul ayındakı məruzəsində deyildiyi kimi, ABŞ-da neftə olan tələbatın stabil qalmasına baxmayaraq, İqtisadi Əməkdaşlıq İnkişaf Təşkilatı (İƏİT) ölkələrində neftə olan tələbat azalır.
Kartelin qiymətlərinə əsasən, iyun ayında neft tələbatı sutkada bir milyon barel azalıb. Bu ilin may ayında bu göstərici sutkada üç milyon barel təşkil edib. Azalmanın ləngiməsi ABŞ-da neftə olan tələbatın stabilizasiyası ilə müşahidə edilib.
Proqnozlara əsasən, İƏİT ölkələrində neftə olan tələbat bu ildə 1,82 milyon barel azalaraq sutkada 45,71 milyon barelə çatacaq. Keçmiş Sovet İttifaqı ölkələrində tələbat 0,12 milyon azalaraq sutkada 3,99 milyon barelə bərabər olacaq.
OPEK 2010-cu ildə neftə olan tələbatın bərpasını gözləyir. OPEK-in gözlədiyi kimi tələbatın ikiillik azalmasından sonra növbəti ildə neft tələbatı cüzi artacaq - sutkada 0,5 milyon barel. İƏİT-ə daxil olmayan ölklərdə neftə olan tələbat növbəti ildə sutkada 0,8 milyon, Çində isə 0,3 milyon barel artacaq. OPEK-in proqnozlarına əsasən, İƏİT ölkələrində neftə olan tələbatın azalması 2010-cu ildə də davam edəcək və sutkada 0,3 milyon barel azalacaq. ABŞ-da neft tələbatının 2010-cu ildə artımı bu ildə olan 0,7 milyon barel azalmaya nisbətən sutkada 0,2 milyon barel təşkil edəcək.
Məqalə müəllifi ilə əlaqə ünvanı: [email protected]
