Azərbaycan, Bakı, 11 avqust / Trend , müxbir E. İsmayılov/
Hazırda ARDNŞ (Azərbaycan Respublikası Dövlət Neft Şirkəti) "Bakı-Novorossiysk" neft kəməri ilə sutkada orta hesabla xüsusi vəsaiti hesabına işlənmiş yataqlardan hasil olunan 10 min ton neft nəql edir. Bu barədə çərşənbə axşamı neft-qaz bazarındakı mənbədən bildirilib.
"Neft nəqli planauyğun həyata keçirilir və hazırda sutkada orta hesabla 10 min ton təşkil edir", - mənbədən deyilib.
Mənbədən məlumat verildiyi kimi, sabah şimal neft kəməri üzrə nəqlin planlı dayandırılması gözlənilir. Dəqiqləşdirilmədiyinə görə, nəqlin dayandırılma vaxtını mənbə açıqlamayıb. Plana əsasən, nəql səkkiz saata dayandırılacaq.
ARDNŞ avqustun əvvəlində bu aya planlaşdırılan neft həcminin nəqlinə başlayıb. Nəqlin avqustun 27-də başa çatdırılması gözlənilir.
Proqnoza əsasən, avqustda neft kəməri ilə ümumilikdə iyuldakı 248 min tona qarşı 240 min tona yaxın Azərbaycan neftinin ixrac olunması planlaşdırılır. Neft kəməri ilə sentyabrda 140 min ton, oktyabrda 248 min ton, noyabrda 240 min ton, dekabrda isə 140 min ton neft ixrac etmək planlaşdırılır.
Mənbənin bir müddət əvvəl dediyi kimi, avqustda planlı texniki işlərin keçirilməsinə görə "Bakı-Novorossiysk" neft kəməri ilə Azərbaycan neftinin daşınması ümumilikdə 24 saat müddətində 3 dəfə dayandırılacaq. Qrafikə əsasən, neft kəməri ilə nəql 12, 15 və 25 avqustda, hər dayandırılmada səkkiz saat dayandırılacaq.
Novorossiysk limanı vasitəsilə ARDNŞ neft məhsullarının yükboşaltmasını həyata keçirir. ARDNŞ-nin məlumatına görə, yanvar-iyun aylarında "Bakı-Novorossiysk" boru kəməri ilə 1,2 milyon tondan çox neft ixrac olunub.
2009-cu ildə ARDNŞ "Bakı-Novorossiysk" boru kəməri ilə neft nəqlini 2,5 milyon tonadək artırmaq niyyətindədir. Bu göstərici 2008-ci ildə 1,3 milyon ton olub.
Bu gün Azərbaycan "Bakı-Novorossiysk" boru kəməri ilə ixrac vasitəsilə digər istehsalçıların nefti ilə qarışdırılaraq Urals markalı neftə çıxış əldə edir.
2007-ci ilin sonuna qədər "Bakı-Novorossiysk" boru kəmərinin operatoru ABƏŞ olub, sonra bu funksiyanı ARDNŞ-yə ötürüb.
Məqalə müəllifi ilə əlaqə ünvanı: [email protected]