Azərbaycan, Bakı, 14 avqust / Trend , müxbir A.Bədəlova /
OPEK 2010-cu ildə kartelə daxil olmayan ölkələr tərəfindən tədarük ediləcək neftin həcminin sutkada 0,43 milyon barel artaraq 51,17 milyon barelə çatacağını proqnozlaşdırır ki, bu da OPEK-in ötən ay verdiyi proqnozdan 0,1 milyon barel çoxdur.
OPEK-in neft bazarı üzrə avqust məruzəsində deyilir ki, dəyişmənin əsas səbəbi Rusiyanın tədarük həcminə olan proqnozlarda müsbət dəyişikliklərin olmasıdır. Proqnozlara əsasən, Rusiyanın 2010-cu ildəki neft tədarükü sutkada 9,73 milyon barel təşkil edəcək ki, bu da 2009-cu ildəki göstəricidən 50 min barel, OPEK-in bir müddət əvvəl verdiyi proqnoz həcmindən 0,1 milyon barel çoxdur.
Kartelin proqnozlarına görə, OPEK-ə daxil olmayan ölkələr tərəfindən neft tədarükünün ən böyük həcmi gələn ilin dördüncü rübündə - sutkada 51,55 milyon barel, ən kiçik həcm isə ikinci rübdə (sutkada 50,89 milyon barel) - gözlənilir.
OPEK bu ölkələrin ümumilikdə 2009-cu il üçün proqnozlarını da 40 min barel artırıb. Yeni proqnozlara görə, bu ölkələrin neft tədarükü 0,27 milyon barel artaraq sutkada 50,74 milyon barelə çatacaq.
Keçmiş SSRİ ölkələri bu il sutkada 12,72 milyon barel, 2010-cu ildə isə 12,93 milyon barel tədarük edəcək. İqtisadi Əməkdaşlıq və İnkişaf Təşkilatı ölkələrində bu rəqəmlər bu il müvafiq olaraq 19,35 milyon barel, 2010-cu ildə isə 19,15 milyon barelə bərabər olacaq.
OPEK 2009-cu ildə Azərbaycanda neft tədarükü həcminin sutkada 90 min barel artaraq 0,99 milyon barel təşkil edəcəyini proqnozlaşdırır. Kartelin proqnozlarına əsasən, dördüncü rübdə bu rəqəm sutkada bir milyon barelə çatacaq. 2010-cu ildə neft tədarükü sutkada 130 min barel artaraq 1,12 milyon barelə çatacaq. Proqnozlara görə, ən böyük neft tədarükü həcmi gələn ilin dördüncü rübündə - sutkada 1,19 milyon barel olacaq.
OPEK-in proqnozlarına görə, Qazaxıstanın neft tədarükləri 80 min barel artaraq sutkada 1,49 milyon barel təşkil edəcək. 2010-cu ildə bu rəqəm 110 min barel artımla 1,6 milyon barelə bərabər olacaq.
OPEK-in proqnozlarına görə, iyul ayında ümumdünya neft tədarükü həcmi sutkada 0,76 milyon barel artaraq 83,81 milyon barelə bərabər olub. OPEK-in tədarük həcmi 160 min barel artımla 28,68 milyon barelə çatıb. OPEK-in ümumdünya hasilat həcmindəki payı cüzi azalaraq 34,2 faizə enib.
Məqalə müəllifi ilə əlaqə ünvanı: [email protected]
