Azərbaycan, Bakı, 21 avqust / Trend , müxbir E.İsmayılov /
ARDNŞ-in (Azərbaycan Respublikası Dövlət Neft Şirkəti) imkanları ona Gürcüstanda yeraltı qaz anabrının həm layihələndirilməsi, həm də inşasını aparmağa imkan verir. Bu barədə cümə günü neft-qaz bazarındakı mənbə deyib.
"ARDNŞ-in Ninoçmind rayonunda yeraltı qaz anbarının layihəsini hazırlamaq və inşasını həyata keçirmək üçün bütün imkanları, o cümlədən texniki imkanları var", - mənbə deyib.
Mənbənin dediyi kimi, bu layihənin texniki-iqtisadi əsaslandırılması (TİƏ) hələ hazır deyil. "Yalnız TİƏ-nin hazırlanmasından sonra konkret həcm və rəqəmlər barədə danışmaq olar", - mənbə əlavə edib.
Gürcüstanda tikilməsi planlaşdırılan qaz anbarının mümkün gücü 250-500 milyon kubmetr arasında dəyişir, mənbə deyib. Qaz anbarı əvvəllər neft və qaz çıxarılan yatağın bazasında yaradılacaq.
ARDNŞ rəhbəri Rövnəq Abdullayevin bir müddət öncə bildirdiyi kimi, şirkət hələ də Gürcüstanda yeraltı qaz anbarının inşasında iştirak niyyətini saxlayır. ARDNŞ hazırda bu məsələ çərçivəsində Gürcüstan hökuməti ilə danışıqları davam etdirir. Gürcüstana qaz idxalının əsas hissəsini ARDNŞ həyata keçirir. Şirkət bu bazarın 75 faizini təmin edir və gələcəkdə ARDNŞ bazarda iştirak payını genişləndirmək istəyir. "Buna görə də, burda 300 milyon kubmetrlik qaz anbarının olması biznesimizə yaxşı təsir göstərəcək", - Abdullayev deyib.
Bir müddət əvvəl Bakıda Gürcüstanın energetika naziri Aleksandr Xetaqurinin dediyi kimi, qaz anbarının üç fazada inşası planlaşdırılır: birinci - saxlama gücü 450 milyon kubmetr, ikinci - 1,5 milyard kubmetr, üçüncü - 5 milyard kubmetr.
"İkinci və üçüncü faza regional miqyasda nəzərdə tutulur. Azərbaycan sonradan, o cümlədən Cənubi Qafqaz və Nabukko qaz kəməri ilə Avopaya nəql etmək üçün qaz saxlamaq istəsə, bu anbardan istifadə edə bilər", - Xetaquri deyib.
Məqalə müəllifi ilə əlaqə ünvanı: [email protected]
