Azərbaycan, Bakı, 20 oktyabr / Trend , mü3xbir E.İsmayılov/
Azərbaycan qazının 2010-cu ildən Rusiyaya ixracına başlanılması üçün boru kəməri infrastrukturu hazırlanıb. ARDNŞ-ın prezidenti Rövnəq Abdullayev bazar ertəsi bildirib ki, Qazıməmməd-Mozdok boru kəmərinin hərəkət istiqaməti dəyişdirilib və onunla texniki olaraq hər il təxminən yeddi milyard kubmetr qaz ötürmək olar, əvvəl bu göstərici beş milyard kubmetr təşkil edirdi.
"Hazırda mütəxəssislərimiz bu boru kəməri üzərində işləyir. Onun artıq hərəkət istiqaməti dəyişdirilib və hazırda biz onunla ildə təxminən yeddi milyard kubmetr qaz ötürə bilərik", - ARDNŞ rəhbəri bildirib.
Oktyabrın 14-də Bakıda ARDNŞ və Rusiyanın "Qazprom" şirkəti Azərbaycan qazının Rusiyaya tədarükü barədə ortamüddətli müqavilə imzalayıb. Müqavilənin şərtləri 2010-cu ildən ildə 500 milyon kubmetrdən az olmayan qaz həcminin Rusiyaya tədarükünü nəzərdə tutur.