Azərbaycan, Bakı, 12 noyabr / Trend /
Azərbaycan Sənaye və Energetika Nazirliyi yanında Alternativ və Bərpa Olunan Enerji Mənbələri üzrə Dövlət Agentliyinin təsdiq edilməsi haqqında Azərbaycan Prezidentinin fərmanına müvafiq olaraq, alternativ və bərpa edilə bilən enerji mənbələri sahəsində fəaliyyət nazirliyinin xüsusi icazəsi əsasında həyata keçiriləcək.
Alternativ və bərpa edilə bilən enerji mənbələri üzrə fəaliyyət , xüsusilə də layihələşmə, inşaat və istismar məsələləri Sənaye və Energetika Nazirliyi tərəfindən verilən xüsusi icazə (lisenziya) əsasında həyata keçiriləcək.
Fərmana müvafiq olaraq, Nazirlər Kabinetinə tapşırılıb ki, bir ay müddətində alternativ və bərpa olunan enerji mənbələri üzrə fəaliyyətə xüsusi icazə verilməsi qaydalarını təsdiq etsin və bu barədə prezidentə məlumat versin. Nazirlər Kabineti eyni zamanda qüvvədə olan normativ hüquqi aktların müvafiq fərmana uyğunlaşdırılması barədə təkliflərini hazırlayıb prezidentə təqdim etməlidir.
Dövlət başçısı noyabrın 10-da Alternativ və Bərpa Olunan Enerji Mənbələri üzrə Dövlət Agentliyinin əsasnaməsinin təsdiqinə dair fərman imzalayıb.
