Azərbaycan, Bakı, 18 iyun /Trend/
Yanvar-may aylarında ARDNŞ (Azərbaycan Dövlət Neft Şirkəti) ötən ilin müvafiq dövründəki 509,04 milyon kubmetr qaza qarşı 793,8 milyon kubmetr qaz ixrac edib. Bu barədə şirkətin cümə günü yaydığı məlumatında deyilir.
Mayda ARDNŞ ötən ilin analoji dövründəki 50,86 milyon kubmetrə qarşı, 152,3 milyon kubmetr qaz ixrac edib.
Bu gün ARDNŞ öz qazını Gürcüstana və Rusiyaya ixrac edir.
Gürcüstana qaz nəqli şirkətin Qazax rayonu ərazisində iki ölkəni birləşdirən boru kəməri vasitəsilə gürcü bazarındakı fəaliyyəti çərçivəsində həyata keçirilir. Bu kəmərlə qaz ixracının gücü ildə 3 milyard kubmetr qaz təşkil edir.
Azərbaycan qazının Rusiyaya nəqli bu il yanvarın 1-dən başlayıb və "Mozdok-Qazıməmməd" boru kəməri vasitəsilə həyata keçirilir. Boru kəməri ildə 5 milyard kubmetrədək qaz nəql etmək qabiliyyətinə malikdir. 2007-ci idə Azərbaycan bu qaz kəməri ilə 4,5 milyard kubmetrədək qaz idxal edib. Lakin sonralar Azərbaycan Rusiya qazının idxalından imtina edib.
