Azərbaycan, Bakı, 14 avqust /Trend, müxbir E.İsmayılov/
ARDNŞ-in (Azərbaycan Dövlət Neft Şirkəti) iştirak payına malik olduğu "Petkim" neft-kimya kompleksi ixracın həcmini 500 milyon dollara çatdırmaq niyyətindədir. Bu barədə "Petkim"in SOCAR/TURCAS AS-ın icraçı-direktoru Kənan Yavuza istinadən yaydığı məlumatda deyilir. Bu göstərici 2009-cu ilin analoji göstəricisini 150 milyon dollar ötüb.
Yavuzun dediyi kimi, kompleks bu göstəricilərə 2008-ci ildə nail olub və bu il müəssisə bu nəticələrə nail olmağa istiqamətlənib. Yavuz onu da qeyd edib ki, iqtisadi böhranın nəticələrini bir il ərzində aradan qaldırmaq mümkün olacaq.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verir.
"Petkim Petrokimya Holding" plastik qablaşdırmalar, parçalar, PVC, yuyucu vasitələr istehsal edir və Türkiyədə belə məhsulların yeganə istehsalçısıdır. Şirkət məhsullarının ¼-ni ixrac edir.
Həmçinin, iyunun əvvəlində "SOCAR/TURCAS Rafineri" AS yeni neft emalı zavodunun tikilməsinə dair Türkiyə Enerji Bazarını Tənzimləmə Qurumunun lisenziyasını alıb. Yeni zavodun gücü ildə 10 milyon ton təşkil edəcək ki, bunun dörd milyon tonu "Petkim"in xammala olan tələbatının ödənilməsinə yönəldiləcək. Yerdə qalan hissə, o cümlədən, dizel yanacağı, təyyarə yanacağı və digər enerjidaşıyıcıları Türkiyə və Avropa bazarlarında satışa çıxarılacaq.
