Azərbaycan, Bakı, 15 sentyabr /Trend, müxbir E.İsmayılov/
ITGI (Türkiyə-Yunanıstan-İtaliya) qaz boru kəməri layihəsi artıq 2015-ci ilə əməliyyat mərhələsinə çıxa bilər. Bu barədə çərşənbə günü Bakıda "IGI Poseidon"un baş icraçı direktoru Elio Ruceri deyib.
"IGI Poseidon S.A" İtaliyanın "Edison" və Yunanıstanın "Depa" şirkətləri tərəfindən "Poseidon" adı ilə tanınan Yunanıstan-İtaliya boru kəmərinin hazırlanması və tikintisi üçün yaradılıb.
Rucerinin sözlərinə görə, bununla yanaşı, Xəzərin Azərbaycan sektorunda "Şahdəniz" qaz-kondensat yatağının işlənməsinin ikinci mərhələsinin müddətini də müəyyən etmək lazımdır.
"Prinsipcə, vaxt qrafikinə əməl olunsa, 2015-ci ilə biz fəaliyyətin əməliyyat mərhələsinə çıxa bilərik. Lakin eyni zamanda biz "Şahdəniz" yatağının işlənməsinin müddətini də müəyyən etməliyik", - o qeyd edib.
Hazırda layihənin həyata keçirilməsində "Şahdəniz" yatağının qazı nəzərdə tutulur, çünki bu yatağın qazı artıq Türkiyəyə tədarük edilir.
Onun sözlərinə görə, Xəzər regionu böyük həcmdə qaz ehtiyatlarına malikdir, lakin bununla yanaşı, "Şahdəniz" yatağı resursları Avropaya tədarük edilən yeganə yataqdır.
Böyük həcmli qazdan danışarkən, Türkmənistan və İrandan qaz tədarükü nəzərdə tutulur. Onların Avropa bazarına tədarükü üçün "Nabukko" kimi böyük layihə lazımdır. Rucerinin sözlərinə görə, halbuki ITGI orta həcmlərə istiqamətlənib və iqtisadi baxımdan Türkiyə sərhədindən Avropa bazarlarınadək qaz tədarükü layihəsinin ən sərfəlisidir. Bu boru kəmərinin maksimal gücü 12 milyard kubmetr təşkil edir.
Ruceri onu da qeyd edib ki, ITGI təkcə Yunanıstan və İtaliyaya deyil, eləcə də Avropanın digər bazarlarına qaz tədarük etməyi nəzərdə tutub.
Onun sözlərinə görə, proqnozlara əsasən, 2020-ci ilədək Avropada qaz istehlakı 600-650 milyard kubmetrədək artmalıdır. Defisit isə 150 milyard kubmetr təşkil etməlidir. Odur ki, yeni qaz tədarükü layihələrinin həyata keçirilməsi zərurətdən doğur.
ITGI qaz kəməri Xəzər regionu və Yaxın Şərq ölkələrindən Aİ ölkələrinə qaz tədarükünü nəzərdə tutan "Cənub dəhlizi" çərçivəsində layihələrdən biridir. "Cənub dəhlizi" layihəsi üçün əsas tədarükçü qismində Azərbaycan, xüsusilə də "Şahdəniz" yatağının işlənməsinin ikinci mərhələsində hasil edilən qaz hesab edilir.
