Azərbaycan, Bakı, 18 oktyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) yaxın günlərdə Azərbaycanda şəxsi brendi altında daha iki yanacaqdoldurma məntəqəsi açmağı planlaşdırır. Bu barədə bazar ertəsi ARDNŞ-dəki mənbə məlumat verib.
Mənbənin sözlərinə görə, YDM-lərdən biri Ələt qəsəbəsi, ikincisi Bakı-Quba istiqamətində yolun kənarında istismara veriləcək.
"Yaxın günlərdə bu stansiyalar açılacaq və sürücülərin ixtiyarına veriləcək", - mənbə bildirib.
Bir ay bundan əvvəl şirkət daha iki YDM açıb. Onlardan biri Sabunçu dairəsinin yaxınlığında, ikincisi isə Qala qəsəbəsinin yolunda yerləşir.
Bundan əvvəl ARDNŞ şirkətinin rəhbəri Rövnəq Abdullayevin dediyi kimi, bu ilin sonuna qədər istismara verilən YDM-lərin sayı 10 ədəd təşkil edəcək. Ümumilikdə ARDNŞ Azərbaycanda 26-30 yanacaqdoldurma məntəqəsi açmağı planlaşdırır. Həmçinin, stansiyaların respublikanın giriş və çıxış yollarında tikilməsinə böyük diqqət ayrılır. Azərbaycanda YDM-lərin inşasına qoyulan investisiyalar 20 milyon manat təşkil edir.
ARDNŞ brendi altında ilk üç YDM mayın 7-də açılıb. Hər üç stansiya Bakı şəhərində - Heydər Əliyev adına Bakı Beynəlxalq Hava Limanına gedən şose, Zığ şosesi və Bibiheybət qəsəbəsində yerləşir.
Gələn il Azərbaycanda daha 10 YDM-in inşası planlaşdırılır.
"SOCAR Petroleum"un səhmdarları ARDNŞ (51 faiz) və ABŞ-ın A.P. International (49 faiz) şirkətidir. "SOCAR Petroleum" 2008-ci il yanvarın 21-də qeydiyyatdan keçib.
