Azərbaycan, Bakı, 10 noyabr /Trend/
İyul-oktyabr aylarında Azərbaycanda hasil olunan neftin böyük hissəsinin ixrac olunduğu Bakı-Tbilisi-Ceyhan boru kəməri ilə 856 min ton Türkmənistan nefti nəql olunub. Bu barədə çərşənbə günü ARDNŞ-nin (Azərbaycan Respublikası Dövlət Neft Şirkəti) yaydığı məlumatda deyilir.
Oktyabrda neft kəməri ilə 201 min tona yaxın türkmən nefti nəql olunub.
İyuldan türkmən neftinin BTC ilə nəqli ARDNŞ-nin "Dragon oil" və Türkmənistanda neft hasilatı ilə məşğul olan digər şirkətlərlə müqaviləsi çərçivəsində həyata keçirilir.
"SOCAR Trading" nefti Türkmənistandakı istehsalçılardan alır, onu Xəzər dənizi vasitəsilə Bakıyadək nəql edir. "BTC Co" şirkəti neftin bu həcmini Bakı-Tbilisi-Ceyhan kəməri ilə nəql edir və Aralıq dənizindəki Ceyhan limanında onu "SOCAR Trading"ə təhvil verir.
Bundan əvvəl Bakı-Tbilisi-Ceyhan kəməri ilə "Tengiz" yatağından "Tengizchevroil" şirkətinin Qazaxıstan nefti nəql olunub, lakin nəql şərtlərinin razılaşdırılmaması səbəbindən neftin vurulması cari ildən dayandırılıb.
"BTC Co"nun səhmdarları aşağıdakılardır: BP (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz ); "Total" (5 faiz); "İtochu" (3,40 faiz ); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
Boru kəmərinin gücü sutkada 1,2 milyon barel neft təşkil edir.