Azərbaycan, Bakı, 23 avqust /Trend, müxbir E.İsmayılov/
Yanvar-iyunda BP şirkətinin Səngəçal neft terminalı boru kəmərləri və dəmiryol vasitəsilə 154,5 milyon barel neft nəql edib. Bu barədə BP şirkətinin ilin birinci yarısı üzrə hesabatında deyilir.
Məlumata görə, terminaldan ixrac olunan neftin ümumi həcmindən ilin birinci yarısında Bakı-Tbilisi-Ceyhan boru kəməri ilə 135,7 milyon barel, Bakı-Supsa neft kəməri marşrutu ilə 15,2 milyon barel, dəmir yolu ilə isə 3,6 milyon barel neft nəql edilib.
İlin birinci yarısında Bakı-Tbilisi-Ceyhan boru kəmərinə qoyulan əsaslı xərclər səkkiz milyon dollar təşkil edib. İlin yekunları üzrə bu göstəricinin 65,9 milyon dollara çatdırılması planlaşdırılır.
Habelə ilin birinci yarısında "Şahdəniz" qaz-kondensat yatağından qaz emalının sutkalıq həcmi 17,7 milyon kubmetr təşkil edib.
Səngəçal terminalından qazın nəqli Cənubi Qafqaz boru kəməri (Bakı-Tbilisi-Ərzurum) vasitəsilə həyata keçirilir.
Hesabatda deyildiyi kimi, ilin birinci yarısında qaz kəmərinin əsaslı xərclərinin həcmi 3,7 milyon dollar təşkil edib.
Hazırda terminalın texniki emal sisteminin ümumi gücü 1,2 milyon barel, "Şahdəniz" yatağından hasil olunan qaz üçün isə sutkada 25,5 milyon kubmetr (terminalın ümumi qaz emalı gücü sutkada 39,5 milyon kubmetrdir) təşkil edir.