Azərbaycan, Bakı, 21 sentyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) gələn ildən perspektivli struktur və yataqlarda kəşfiyyat və qiymətləndirmə quyularının qazılması məqsədilə yeni üzən qazma qurğunun tikintisinə başlayacaq. Trend-in məlumatına görə, bu barədə çərşənbə günü jurnalistlərə Rövnəq Abdullayev bildirib.
Onun sözlərinə görə, ən azı iki qurğunun tikintisi barədə qərar qəbul olunub.
Abdullayev deyib ki, hazırda Xəzərdə müxtəlif struktur və yataqlarda kəşfiyyatla bağlı bir neçə layihənin olması ilə əlaqədar yeni qazma qurğularına böyük tələbat var.
Bu gün ARDNŞ yeni müqavilələr çərçivəsində böyük hasilat və kəşfiyyat planlarına malik olan Total və BP şirkətləri ilə danışıqlar aparır. Eləcə də "Ümid" yatağında işlərin görülməsi və "Babək" strukturunda kəşfiyyat aparmaq niyyətində olan ARDNŞ yeni qurğuya ehtiyac hiss edir.
