Qazaxıstan, Astana, 25 aprel / Trend, müxbir D.Muxtarov /
Bakı-Tbilisi-Ceyhan (BTC) neft kəməri ilə ildə 20 milyon tondan artıq Qazaxıstan neftinin nəqli 2025-ci ildən sonra real olacaq. Bu barədə çərşənbə günü Astanada "IHS CERA" şirkətini baş direktoru Metyu Seygers bildirib.
Onun sözlərinə görə, BTC və Qazaxıstan Xəzər Nəqliyyat Sistemi (QXNS) Qazaxıstanın ixrac tələbatlarının təmin olunması üçün mühüm obyektlərdir.
"Qazaxıstandan BTC ilə neftin nəqli həcmləri bir çox hallarda Azərbaycan neftinin daşınmasından sonra qalan imkanlardan asılı olacaq", - Seygers deyib.
Onun sözlərinə görə, hazırda BTC ilə ildə 40 milyon tondan az neftin nəql olunmasına baxmayaraq, kəmər real olaraq 60 milyon tonadək nəql edə bilər.
"BTC-nin genişləndirilməsi nasos stansiyalarının sayının artırılması hesabına həcmin ildə 80 milyon tonadək artırılması hesabına mümkündür, lakin tərəfdaşlar bu qədər bahalı həlli dəstəkləmirlər", - Seygers deyib. Bundan başqa, o əlavə edib ki, Kaşağan yatağının işlənməsinin ikinci mərhələsində vəziyyətin necə inkişaf edəcəyinə baxmaq lazımdır.
