Azərbaycan, Bakı, 14 may /Trend, müxbir E.İsmayılov/
Azərbaycan Respublikası Dövlət Neft Şirkətinin (ARDNŞ) "Azəriqaz" İstehsalat Birliyi (İB) Hacıqabuldan Gürcüstan sərhədinədək magistral qaz kəmərində əlavə xəttin tikintisi üzrə işləri tam başa çatdırıb. Bu barədə bazar ertəsi Trend-ə İB-dən məlumat veriblər.
ARDNŞ bu qaz kəməri ilə Gürcüstan istiqamətində qaz tədarük edir.
"Qaz kəmərinin tikintisi ilə bağlı işlər tamamlanıb və o, artıq sınaqdan keçirilib", - İB-dən qeyd ediblər. İşlər Azərbaycanın Ağsu rayonu ərazisində aparılıb.
Yeni xəttin işə salınması üçün magistral qaz kəməri ilə qazın vurulmasını dayandırmaq lazımdır.
"Yeni xəttin qoşulması təmir işlərinin aparılması ilə əlaqədar qazın vurulmasının dayandırılmasından sonra mümkün olacaq" , - İB-dən deyiblər.
Qaz kəmərinin yeni xəttinin istismara verilməsindən sonra köhnə xətt ilə qazın nəqli dayandırılacaq.
"Yeni xəttin çəkilməsindən sonra köhnə xətt sökülməyəcək. O, ehtiyat qismində saxlanılacaq" , - İB-dən vurğulayıblar.
Qaz kəmərinin yeni xəttinin uzunluğu təqribən 10 kilometr, diametri isə 1220 millimetrdir. Tikinti işlərini ARDNŞ-nin "Neft-qaz tikinti" tresti aparıb.
