Azərbaycan, Bakı, 1 oktyabr /Trend, müxbir A.Axundov/
ARDNŞ (Azərbaycan Respublikası Dövlət Neft Şirkəti) "Azəri-Çıraq-Günəşli" (AÇG) üzrə tərəfdaşlarına Xəzərin Azərbaycan sektorundakı həmin blokda dərin qaz yataqlarının işlənməsi layihəsi üzrə yeni müqavilənin ilkin variantını təqdim edəcək. Bu barədə bazar ertəsi Trend-ə şirkətin yüksək vəzifəli nümayəndəsi məlumat verib.
Onun sözlərinə görə, müqavilənin ilkin versiyası üzərində işlər praktiki olaraq başa çatıb.
"Biz artıq draftın hazırlanmasını başa çatdırırıq. Onun hazırlanması hələ imzalanmanın baş tutacağı demək deyil, çünki müqaviləni hələ razılaşdırmaq lazımdır. Hazırlıq başa çatdıqdan sonar biz onu BP-yə və başqa tərəfdaşlara təqdim edəcəyik. Bundan sonra danışıqlar prosesi başlayacaq. Düşünürəm ki, razılığa gələcəyik", - mənbə bildirib.
Hazırda AÇG-nin neft ehtiyatları PSA tipli müqavilə əsasında işlənir. Lakin mənbənin sözlərinə görə, layihənin bütün iştirakçılarının imzalayacağı müqavilə yeni formada bağlanacaq.
"Bu, yeni "Risk Service Agreement" (kompensasiyanın minimal zəmanəti ilə müqavilə) formatında saziş olacaq. Təsdiqlənmə də həmin formada olacaq - saziş parlamnetdə təqdilənəcək", - o deyib.