Bakı. Trend:
2023-cü ilin yanvar ayında İtaliya Trans-Adriatik boru kəməri ilə Azərbaycandan 842 722 785 avro dəyərində təbii qaz satın alıb.
Bu barədə Trend-ə Avropa İttifaqının (Aİ) statistika idarəsi olan "Eurostat"dan bildiriblər.
"Eurostat"ın məlumatlarına əsasən, bu ilin yanvar ayında Azərbaycandan İtaliyaya 732 675 000 kubmetr qaz ixrac olunub.
Hesabat dövründə Aİ ölkələrinin Azərbaycan qazının idxalına çəkdikləri ümumi xərc 1 006 939 047 avro, tədarüklərin həcmi isə 972,9 milyon kubmetr olub.
Qeyd edək ki, 2023-cü ilin yanvar-fevral ayları ərzində ölkədə qaz hasilatı 8 milyard kubmetr təşkil edib. "Azəri-Çıraq-Günəşli" yatağından 2,2 milyard kubmetr, "Şahdəniz" yatağından isə 4,4 milyard kubmetr qaz hasil edilib. Azərbaycan Dövlət Neft Şirkəti (SOCAR) tərəfindən isə 1,4 milyard kubmetr qaz hasil olunub. 2022-ci ilin müvafiq dövrü ilə müqayisədə qaz hasilatı 4 faiz, yəni 319 milyon kubmetr artıb.
Hesabat dövründə qaz ixracı 4,3 milyard kubmetr təşkil edib ki, bu da ötən ilin müvafiq dövrü ilə müqayisədə 13 faiz azdır. Bu ilin yanvar-fevral aylarında Avropaya 1,9 milyard kubmetr, Türkiyəyə 1,7 milyard kubmetr, Gürcüstana isə 0,7 milyard kubmetr qaz nəql olunub. Bu dövr ərzində TANAP vasitəsilə Türkiyəyə 0,9 milyard kubmetr qaz nəql olunub.
Azərbaycan Cənub Qaz Dəhlizi vasitəsilə Avropaya təbii qaz tədarükünü 31 dekabr 2020-ci il tarixindən başladıb. Cənub Qaz Dəhlizinin Avropa hissəsi olan Trans-Adriatik qaz kəməri (TAP) vasitəsilə kommersiya istismarı başladıqdan etibarən ümumilikdə 22 milyard kubmetr qaz tədarük olunub. Azərbaycan bu il Avropaya 12 milyard kubmetr qaz ixrac etməyi planlaşdırır.
Twitter: @Lyaman_Zeyn