Azərbaycanın neft şirkətlərinin fəhlələri Neft və Qaz Sənayesi Fəhlələrinin Həmkarlar İttifaqları Respublika Komitəsinə (NQSFHİ RK) üzv olmaq üçün maraq göstərirlər. NQSFHİ RK-dən Trend ə verilən məlumata görə, bu maraq McDermott şirkətindəki tətillərlə bağlı baş vermiş son hadisələrdən sonra müşahidə olunub. "Bu günlərdə analoji məsələ ilə bağlı Binagadi Oil -un bir sıra fəhlələri tərəfindən müraciətlər daxil olub".
İdarədən bildirilib ki, Respublika Komitəsi neft-qaz sənayesi fəhlələrinin sosial müdafiəsinin yaxşılaşdırılması məqsədilə mütəmadi işlər aparır. Onların arasında 50-dən artıq xarici şirkətdə həmkarlar ittifaqı komitələrinin yaradılması da daxildir.
"Hazırda Shirvan Oil, Salyan Oil, Azgerneft, Anshad Petrol, Lukoil Azerbaijan və s. kimi müəssisələrdə analoji komitələr yaradılır. Məsələn, Bosshelf şirkətinin 1100 fəhləsindən 235 nəfəri, McDermott isə 1400 fəhləsindən 400-ü həmkarlar ittifaqı komitəsinin üzvüdür", - deyə Komitədən bildirilib.
Hazırda Azərbaycanda neft-qaz sənayesində fəhləlrin sayı 70 minə yaxındır ki, onlardan 56 mini Azərbaycan Dövlət Neft Şirkətinin əməkdaşıdır.
