Dekabrın sonuncu ongünlüyündə Gobustan Operating Company Ltd (GOC) ARDNŞ-ə kommersiya qazının $46/1 min m3 ($1.29/1 mln. BTU) qiyməti ilə ilk tədarükünün başlanılmasını gözləyir.ARDNŞ-də Trend ə bildirilib ki, hazırda müqavilə sahəsində qaz əməliyyaptları üçün zəruri olan qaz-kompressor stansiyasının inşası üzrə işlər başa çatdırılır.
"Avadanlığın testləşdirilməsi və bütün infrastrukturun qaydaya salınması dekabrın 20-dək başa çatdırılacaq. Ayın sonuncu ongünlüyündə ARDNŞ üçün ilk qaz nəql olunacaq" -deyə şirkətdə bildirilib.
İlk qazın tədarük olunması ilə bağlı rəsmi mərasim 2006-cı ilin yanarında "Cənub-Qərbi Qobustan" müqavilə sahəsində keçiriləcək. İlkin mərhələdə GOC ARDNŞ-ə "Cənub-Qərbi Qobustan"da qazılmış dörd quyudan sutkada 400 min m3 qaz (ildə 146 mln. m3) satmağı təklif edir.
ARDNŞ ilə bağlanmış PSA üzrə "Cənub-Qərbi Qobustan"ın işlənib-hazırlanması ilə GOC ƏŞ məşğul olur. Gobustan Operating Company-də 80% pay Commonwealth Gobustan Limited, 20% ARDNŞ-ə məxsusdur. Commonwealth Gobustan Limited-də 37,17% pay Arawak Energy, 62,83% isə China National Petroleum Company şirkətlər qrupuna məxsusdur.
Müstəqil neft-qaz məsləhətçisi olan Ryder Scott-un məlumatına əsasən, yatağın göstərilmiş ehtiyatları 51,6 mln. bar. neft, ümumən isə (göstərilən üstəgəl mümkün olan) 135,4 mln. bar. təşkil edir. Bununla da göstərilən neft ehtiyatları 15,8 mln. bar. neft və 214,65 mln. f3 qaz təşkil edir. Ümumi (göstərilən üstəgəl mümkün olan) ehtiyatlar 66,6 mln. bar. neft və 412,933 mln. f3 qaz təşkil edir.
