Azərbaycan Beynəlxalq Əməliyyat Şirkəti (ABƏŞ) "Azəri" yatağının mərkəzi hissəsindəki 9-cu quyunun platformaya birləşdirilməsini başa çatdırıb. ABƏŞ-dən Trend ə verilən məlumata görə, bu quyudan şlam təbəqəsinin basılması üçün istifadə olunacaq.
ABƏŞ nümayəndəsinin sözlərinə görə, onun dərinliyi 2493 metr təşkil edir. "Azəri"dəki 10-cu quyu basma su quyusu olacaq. ABƏŞ istismar quyusunun tikintisinə 2006-cı ilin I rübündə başlayacaq. 2006-cı ilin əvvəllərində 2 istismar quyusunun - 11 və 12-nin qazılmasına başlanılacaq.
Oktyabrda ABƏŞ "Azəri"nin mərkəzi hissəsində 8-ci quyunun istismarına başlayıb. Bu quyu sutkada 16 min barel Azeri Light növlü neft hasil edir. 7-ci quyunun debiti 20 min barel xammal təşkil edir. Bu gün "Azəri"nin mərkəzi hissəsindən ümumi neft hasilatı 8 istismar quyusu ilə birgə 240 min barel təşkil edir.
