Azərbaycanın (istehlakçı və sənaye müəssisələrinin) neft məhsullarına olan daxili tələbatını ödəmək üçün yerli NEZ-də emal olunan 6,1 mln ton neft kifayətdir. Trend in xəbər verdiyi kimi, bu barədə sənaye və energetika naziri Natiq Əliyev məlumat verib.
Onun sözlərinə görə, hazırda xam neft ixrac etmək daha sərfəlidir. Ötən il Bakı-Novorossiysk boru kəmərindən əsasən ABƏŞ neftinin nəqli üçün istifadə olunması ilə əlaqədar ARDNŞ öz xammalını yerli NEZ-ə göndərirdi. Nazirliyin hesablamalarına görə, ARDNŞ xam neftin ixracından $45 milyondan çox gəlir əldə edə bilərdi.
Nazir bildirib ki, neft məhsullarının xaricdə satılması sərfəli deyil. Rusiya, İran, Qazaxıstan və Türkmənistanın öz neft məhsulları var və Azərbaycan neftinin bu ölkələrə satılması mümkündür. Ancaq məhsul həmin ölkələrdə hasil olunun neftin qiymətindən ucuz olacaq. "Regionda Azərbaycanın neft məhsullarını almağa hazır olan yeganə ölkə Gürcüstandır. Ancaq bu ölkənin bazarı çox məhduddur", - deyə o qeyd edib.
Uzaq xarici ölkələrə də neft məhsulunun satışı sərfəli deyil. Bu, məhsulların dəmir yolu ilə daşınması, limanlarda emalı, sığorta xərclərini özündə birləşdirən nəql prosesinin baha başa gəlməsi ilə əlaqədardır.
N.Əliyevin sözlərinə görə, beynəlxalq standartlara cavab verən neft məhsulları istehsalı üçün respublikada NEZ-in yenidən qurulmasına bir neçə yüz mln dollar tələb olunur. Ancaq Avropa bazarı özünü yaxşı qoruyur. "Buna görə də Azərbaycanda müəssisələr bərpa olunduqdan sonra Avropanın standartları artırmayacağına və nəticədə NEZ-ə təkrar sərmayə qoyuluşu zərurətinin yaranmayacağına heç kim zəmanət verə bilməz", - deyə nazir vurğulayıb.
