Azərbaycanın "Bakıelektrikşəbəkə" və "Sumqayıtelektrikşəbəkə" paylaşdırıcı şəbəkələrin idarəsi üçün xarici şirkətlərin cəlb olunması üzrə hələ heç bir planı yoxdur. Trend xəbər verir ki, bu barədə respublika höküməti baş nazirinin birinci müavini Yaqub Eyyubov məlumat verib.
Onun sözlərinə görə, şəbəkələrin idarəsi üçün yaradılmış şirkətlər özləri öz işlərini görə bilərlər. O bildirib ki, yaxın vaxtlarda bu şəbəkələrin Barmek şirkətindən təhvil-təslim prosesi başa çatacaq.
Hazırda qoyulmuş sərmayələrin auditi və idarə üzrə müqavilənin pozulması nəticəsində paylaşdırıcı şəbəkələrin şirkətdən təhvil-təslim prosesi gedir. Türkiyənin Barmek şirkəti 2002-ci ilin əvvəlindən Bakı elektrik şəbəkəsini 25 il müddətinə öz idarəsinə götürüb. Sumqayıt elektrik şəbəkələrini və ölkənin şimal rayonlarını birləşdirən Sumqayıt elektrik şəbəkəsini isə şirkət 2002-ci ilin oktyabr ayından öz idarəsinə götürüb. Həmçinin Barmek 2004-cü ilin sonunda Bakıda elektrik-mexanika avadanlığı istehsal edən zavodu özəlləşdirib və bu zavod üzrə müqavilə sonradan pozulub.