Rusiyanın Qazprom şirkəti bu gün 2007-ci ildə ölkəyə qaz tədarüklərinin həcmi və qiyməti haqqında təkliflərə Azərbaycanın cavab verməsini gözləyir. Qazpromeksport (Qazpromun törəmə strukturu) şirkətinin Bakıdakı nümayəndəsi Akif Həsənovun Trend ə verdiyi xəbərə görə, Qazprom Azərbaycana 2007-ci ildə 1000 kubmetri 235 ABŞ dolları qiymətinə 1,5 mlrd. kubmetr qaz almağı təklif edib.
Yanvar-noyabr aylarında Qazpromeksport Azərbaycana 4 mlrd. kubmetr qaz tədarük edib.
Cari ildə ARDNŞ 1 min kubmetri 110 ABŞ dollarına təxminən 4,5 mlrd. kubmetr qaz almağı planlaşdırır. Təbii qaz ölkəyə Şirvanovka-Qazıməmməd boru kəməri ilə verilir.
Qazpromun mətbuat xidmətindən Trend ə bildiriblər ki, tərəflər arasında danışıqlar hələ başa çatmayıb. "Çətin ki, bu gün ictimaiyyət üçün hər hansı məlumat olsun", - deyə şirkətin mətbuat xidmətindən məlumat verilib.
Rusiyadan Azərbaycana qaz tədarükünün bütün vaxtı ərzində 2006-cı ilin noyabr ayından respublikaya 25 mlr. kubmetrdən çox qaz tədarük olunub.
