Azərbaycanın "Kürovdağ" quru yatağının bərpasını, kəşfiyyatı və işlənməsini həyata keçirən Shirvanoil şirkətinin PSA tipli müqaviləsi bəzi səbəblərdən hələ qüvvəyə minməyib. Bu barədə Trend ə layihənin iştirakçısı olan Azərbaycan Dövlət Neft Şirkətindən (ARDNŞ) məlumat verilib.
"Şirkət PSA tipli müqaviləyə keçid məsələsi həll olunduqdan sonra yataqda quyunun qazıntısını davam etdirəcək", - deyə ARDNŞ-dən bildirilib.
Qazıntı işləri "Kürovdağ"ın cənub hissəsində Britaniyanın Monumen Oil servis şirkəti tərəfindən yerinə yetiriləcək.
27 iyul tarixli əmrlə ARDNŞ-də "Şirvan oil" birgə müəssisəsinin əsas fondlarından istifadə hüququnun "Shirvanoil" əməliyyat şirkətinə ötürülməsi məsələsi ilə məşğul olan işçi qrupu yaradılıb.
İşçi qrupu "Kürovdağ" neft yatağına daxil olan blokun bərpa olunması, işlənməsi və hasilatın bölüşdürülməsi haqqında ARDNŞ, Caspian Energy Group və ARDNŞ-in tabeçiliyində olan şirkət tərəfindən imzalanmış müqavilə üzrə lazım olan bütün işləri həyata keçirir.
Müqaviləyə əsasən, Dövlət neft şirkəti və Caspian Energy Group şirkətinin hər birinə müəssisədə 50% iştirak payı məxsusdur. Nəzərdə tutulan investisiyaların həcmi 200-300 mln. ABŞ dollarıdır.
"Kürovdağ" yatağı 1929-cu ildə kəşf edilib, 1955-ci ildə işlənməyə başlayıb. Bu günə qədər 36 mln. tondan çox neft hasil olunub, bu zaman Shirvan Oil BM-in payına (1997-ci ildən) 1,6 mln. tondan çox neft düşüb.
