Ağdam. Trend:
“Eel Electric” Məhdud Məsuliyyətli Cəmiyyətinin (MMC) Azərbaycanda ilk dəfə olaraq elektromobillərin şarj cihazlarının istehsalına başlayacaq.
Trend xəbər verir ki, bunu şirkətin texniki direktoru Ruslan Şıxəliyev jurnalistlərə açıqlamasında deyib.
Onun sözlərinə görə, şirkətin məhsulları Qarabağ bölgəsində təmir-bərpa işlərində istifadə olunur:
“Şirkətimiz 2022-ci ildə Ağdam Sənaye Parkının rezidenti olub. İstehsala isə 2024-cü ilin sentyabr ayında başlamışıq. İstehsal sahəsinin birinci mərhələsində 0,4 kV-luq idarəetmə panelləri, 6, 10, 35 kV-luq elektrik yuvaları istehsal olunur. Hazırda 45 nəfərə yaxın yerli əhalini işlə təmin etmişik. İkinci mərhələdə beton kompleks transformator məntəqələrinin beton köşk şəklində istehsalı nəzərdə tutulub. Bu mərhələdə yerli əhalidən 70-80 nəfəri işlə təmin etməyi planlaşdırırıq”.
R.Şıxəliyev yaxın zamanda məhsulların xarici şirkətlərə ixrac olunacağını da diqqətə çatdırıb.
