Azərbaycan, Bakı, 12 dekabr/ Trend , müxbir S.Babayeva/ "Qazaxıstan Siyəzən - Aktau marşrutu üzrə Trans-Asiya-Avropa (TAA) fibrooptik kabel magistralının TransXəzər seqmentinin çəkilməsi layihəsinin realizəsinə hazırdır", - Qazaxıstanın Azərbaycandakı Fövqəladə və Səlahiyyətli Səfiri Serik Primbetov cümə günü bildirib.
"Bir müddət əvvəl tərəflər layihə üzrə növbəti görüşü keçiriblər və danışıqlar davam edir. Biz onun realizəsinə hazırıq", - Primbetov bildirib.
Layihə çərçivəsində, Azərbaycan və Qazaxıstanın operatorları - AR Rabitə Nazirliyinin Beynəlxalq Əlaqələr və Hesablamalar Mərkəzi (BƏHM) və Qazaxıstanın KazTransCom-u arasında protokol imzalanıb. Sənədə əsasən, tərəflər layihə üzrə xərcləri bərabər nisbətdə ödəyəcəklər.
Mayın sonunda KazTransCom, BƏHM, "Aztelekom" İB və Axiom şirkətinin nümayəndələrinin iştirakı ilə görüş baş tutub. Görüşdən sonra qarşıdakı dövrdə işlərin planı ilə bağlı protokol imzalanıb.
"2009-cu ildən magistral üzrə tikinti işlərinin başlaması istisna edilmir", - Qazaxıstanın İnformasiyalaşdırma və Rabitə Agentliyinin sədr müavini Əsgər Bişiqayev əvvəllər deyib.
1999 - cu ildə aparılmış hesablamalara görə, Xəzər dənizinin dibi ilə kabelin çəkilməsinin dəyəri 10 mln. dollar təşkil edir. Layihənin dəyərinin artım istiqamətində dəyişəcəyi istisna olunmur.
Qazaxıstan və Azərbaycan arasında marşrutun uzunluğu təxminən 380 km - dir. Hazırda mövcud marşrut Azərbaycan ərazisini dolanmaqla Türkmənistan və İrandan keçir.
Rabitə Nazirliyində hesab edirlər ki, TAA kabelinin Azərbaycandan çəkilməsi layihəsinin realizəsi marşrutun təxminən 2 min kilometr qısalmasına gətirəcək ki, bu da məlumatın ötürülməsi trafikini sürətləndirəcək.
Müəlliflə əlaqə saxlamaq üçün elektron ünvan: [email protected]