Azərbaycan, Bakı, 07 sentyabr / Trend , müxbir H.Vəliyev /
Rabitə sahəsində Regional Əməkdaşlığın (RRƏ) rəqəmsal yayım üzrə koordinasiya qrupu MDB ölkələrinin tezlik ehtiyatlarının koordinasiyası məsələsinə baxıb. Bu barədə Trend -ın müxbirinə "Teleradio" İstehsalat Birliyindən məlumat verilib.
Mənbədən bildirildiyinə görə, məsələyə Rəqəmsal Yayım üzrə Koordinasiya Qrupunun sentyabrın 3-4-də Astanada keçirilən XI iclasında baxılıb.
İclas iştirakçıları DVB-T\H standartlı yerüstü rəqəmsal televiziyanın yayımlanmasını tətbiq etmək təcrübəsi və planları barədə bir-birilərinə məlumat veriblər. Rəqəmsal televiziyanın tətbiqi üçün ilk növbədə lazımi tədbirlərin siyahısı açıqlanıb.
Həmçinin ictimai verilişlərin yayımlanması üçün rəqəmsal yayım üzrə operatorun təyin olunması, rəqəmsal yayımın tətbiqi üçün xüsusi operatorların cəlb olunması barədə də məlumat verilib.
Koordinasiya qrupunun üzvləri RRƏ ölkələri ərazisində 790-862 MQs (61-69 TVK) radiotezlikli zolaqlardan istifadə məsələsini də nəzərdən keçiriblər və ITU (International Telecommunication Union) və ECPTA (European Conference of Postal and Telecommunications Administrations) araşdırma və işçi qupunun işlərinin nəticələrini müzakirə ediblər.
İclas çərçivəsində yerüstü rəqəmsal televiziya yayımının şəbəkə xidmətləri ərazilərinin təyini, RRƏ ölkələrinin istifadə etdiyi qəbuledici və ötürücü avadanlıqlar anbarının təhlili, yayımın təcrübəvi yayım zonalarının yoxlamalarının nəticələri haqqında məlumat verilib və DVB-T/T2 standartında rəqəmsal yayımın əlverişli texnologiyaları nəzərdən keçirilib.
Məqalənin müəllifi ilə əlaqə ünvanı: [email protected]
