Azərbaycan və İran poçt rabitəsi sahəsində əməkdaşlıq üzrə danışıqların növbəti raundunu keçirəcəklər
Azərbaycan, Bakı, 4 oktyabr /Trend, müxbir H.Vəliyev/
Azərbaycan və İranın poçt administrasiyalarının nümayəndələri poçt rabitəsi sahəsində əməkdaşlıq üzrə danışıqların növbəti raundunu keçirəcəklər. Bu barədə Azərbaycan Rabitə və İnformasiya Texnologiyaları Nazirliyinin bazar ertəsi yayılan məlumatında deyilir.
Nazirliyin məlumatına görə, əməkdaşlıq məsələlərinin müzakirəsi oktyabrın 5-dən 7-dək Tehranda keçiriləcək.
Azərbaycan və İran poçt rabitəsi sahəsində əməkdaşlıq məsələləri ötən ilin dekabrında Azərbaycana İran poçt rabitəsi nümayəndələrinin səfəri zamanı müzakirə olunub.
Tərəflər beynəlxalq poçt göndərişləri, pul köçürmələri, İran ərazisi vasitəsilə Naxçıvan Muxtar Respublikasına yerüstü poçt göndərişlərinin həyata keçirilməsinin mümkünlüyü, poçt markalarının çap edilməsi sahəsində əməkdaşlıq məsələlərini müzakirə ediblər.
Lakin indi hələ ki həllini tapmayan bəzi məsələlər var.
Bundan əvvəl Trend-ə Rabitə və İnformasiya Texnologiyaları Nazirliyinin poçt rabitəsi şöbəsinin rəhbəri Novruz Məmmədovun dediyi kimi, Azərbaycanın poçt rabitə operatoru "Azərpoçt" MMC İran ərazisi vasitəsilə NMR-ə yerüstü poçt göndərişlərini dayandırıb. Onun sözlərinə görə, bu, sərf edilən vaxt və poçt göndərişlərinin çatdırılma proseduru üçün qiymətin yuxarı olması ilə əlaqədardır.
Nazirliyin şöbə rəhbəri hesab edir ki, İran ərazisi vasitəsilə NMR-ə poçt göndərişlərinin çatdırılması üzrə xidmətlərin göstərilməsi poçt göndərişlərinin çatdırılması üçün sadələşdirilmiş prosedur məsələləri ikitərəfli qaydada tətbiq ediləcəyi təqdirdə, özünü maliyyə baxımından doğruldacaq.
İranla poçt rabitəsi sahəsində əməkdaşlıq dövlət rəhbəri İlham Əliyevin 2009-cu il martın 10-da Tehrana səfəri çərçivəsində Azərbaycan Rabitə və İnformasiya Texnologiyaları Nazirliyi və İran Rabitə Nazirliyi arasında imzalanan memorandum çərçivəsində aparılır.
Sənədin müddəalarına əsasən, ikitərəfli görüşlərin mütəmadi keçirilməsi planlaşdırılır.
