Azərbaycan, Bakı, 13 dekabr /Trend, müxbir H.Vəliyev/
2011-ci ildə Azərbaycan Milli Elmlər Akademiyasının (AMEA) Kibernetika İnstitutu "Shirvan oil" əməliyyat şirkətinin və "Siyəzənneft" NQÇİ-nin quyularında intellektual monitorinq və proqnozlaşdırma sistemini tətbiq edəcək. Bu barədə bazar ertəsi Trend-ə İnstitutun direktoru Telman Əliyev məlumat verib.
Əliyevin sözlərinə görə, "Shirvan oil"də sistemin tətbiqi üzrə işlərin birinci rübdə, "Siyəzənneft"də 2011-ci ilin sonlarında aparılması planlaşdırılır.
Kibernetika İnstitutu direktorunun sözlərinə görə, bu günədək artıq ARDNŞ-nin (Azərbaycan Respublikası Dövlət Neft Şirkəti) "Qum adası" yatağındakı beş fəaliyyət göstərməyən quyusunda yerləşdirilmiş monitorinq sistemindən artıq ilk nəticələr alınıb.
"Nəticələr quyular arasında radioəlaqə kanalının və Seysmik Mərkəzin yaradılmasından sonra elan olunacaq. Çünki əldə olunan nəticələr ekspertizadan keçməlidir. Bu gün istifadə olunan rabitə kanalı informasiya axının mübadiləsinin tələblərini təmin etmir. Fasiləsiz rabitənin yaradılması üzrə işlər yaxın on gün ərzində başa çatacaq", - Əliyev deyib.
Quyularda quraşdırılan ötürücülər institutun binasında yerləşən stansiyaya birbaşa birləşdirilib ki, bu da real vaxt rejimində küləyin sürəti, təzyiq, temperatur və s. haqqında məlumat əldə etməyə imkan verir.
Məlumat siqnallar yaradır və sonradan onlar radiokanal vasitəsilə idarəetmə mərkəzinə ötürülür. Hər bir siqnalın özünün müəyyən maneələri var ki, bu da onlara uyğun olaraq arzuolunmaz insidentləri proqnozlaşdırmağa imkan verir.
Bu gün monitorinq sistemi Heydər Əliyev adına Bakı NEZ-in kompressor stansiyasında, "Karasu operating company", "Surahani oil", "Binagadi oil" əməliyyat şirkətlərinə məxsus on quyuda tətbiq olunub.
Sistem elektrik enerjisi məsrəflərini 70 faizədək azaltmağa da imkan verir ki, bu da hasil olunan neftin maya dəyərinə müsbət təsir edir.
