Azərbaycan, Bakı, 24 dekabr /Trend, müxbir H.Vəliyev/
"Şərq-Qərb" transmilli informasiya supermagistralının tikintisi layihəsi iki mərhələdə həyata keçiriləcək. Trend-in məlumatına görə, bu barədə Rabitə və İnformasiya Texnologiyaları Nazirliyinin Maliyyə, uçot və iqtisadi təhlil şöbəsinin rəisi Rəşad Nəbiyev dünən nazirliyin və "Azərbaycan" qəzetinin təşkil etdiyi "dəyirmi masa"da bildirib.
Nəbiyevin sözlərinə görə, birinci mərhələ Xəzərin dibi ilə Şərqi Avropadan Çinə qədər kabel magistralının çəkilişini nəzərdə tutur. İkinci mərhələ çərçivəsində superavrasiya ölkələrinə, xüsusilə Mərkəzi Asiya ölkələrinə sərfəli tariflərlə qoşulma mümkün olacaq.
2011-ci ildə region ölkələrinin dəstəyini qazanmış "Şərq-Qərb" layihəsi üzrə konsorsiumun yaradılması haqqında memorandum imzalanacağı gözlənilir və hazırda layihəni dəstəkləyən tərəflərlə danışıqlar aparılır.
"Hazırda altı ölkənin - Azərbaycan, Rusiya, Türkiyə, Gürcüstan, Qazaxıstan və Çinin aparıcı telekommunikasiya operatorları ilə konsorsiumun yaradılması üzrə danışıqların birinci mərhələsi başa çatıb", - Nəbiyev bildirib.
Konsorsiumun yaradılması kommersiya baxımından layihənin həyata keçirilməsinin başlanğıcını qoyacaq.
Azərbaycanın "Qərb-Şərq" transmilli informasiya supermagistralının yaradılması üzrə təqdim etdiyi bəyanat BMT-nin 66-cı plenar iclası çərçivəsində qəbul olunub. Təşkilat "informasiya kəsiyini", yoxsulluq səviyyəsinin azaldılmasını, iqtisadiyyatın rolunun yüksəldilməsini və regionun inkişafı üçün lokomativ rolu oynayacaq layihəni dəstəkləyib.
"Qərb-Şərq" layihəsi ümumilikdə, 20 ölkəni birləşdirəcək və regionun inkişafı üçün mühüm rol oynayacaq. Layihənin həyata keçirilməsi Qərbi Avropa və Sakit okean hövzəsinə daxil olan ölkələr arasında "informasiya kəsiyi"ni aradan qaldırmağa imkan verəcək.
