Azərbaycan, Bakı, 12 may /Trend, müxbir H.Vəliyev/
"Dilmanc" layihəsi "Bakı Telefon Rabitəsi" İstehsalat Birliyinə "109" xidməti bazasında informasiya-məlumat xidmətinin göstərilməsi üçün "Dilmanc" nitqin tanınması sistemini təqdim edib. Bu barədə cümə axşamı Trend-ə "Dilmanc" layihəsinin rəhbəri Əbülfət Fətullayev bildirib.
Fətullayevin sözlərinə görə, sistem təcrübə istismarına tam hazırdır və onun operatorun şəbəkəsində tətbiqi məsələsi baxılma mərhələsindədir.
"109" informasiya-məlumat xidmətində nitqin tanınması sisteminin tətbiqi haqqında qərar Rabitə və İnformasiya Texnologiyaları Nazirliyindən asılı olacaq", - Fətullayev bildirib.
Nitqin tanınması sistemi səs komandalarının köməyi ilə RSS-kanallardan xəbərlərin toplanmasına, kitabxanaların elektron bazasında axtarış və mövcud ədəbiyyat haqqında xəbərdarlığın həyata keçirilməsinə, elektron poçtu idarə etməyə, poçt yeşiyindəki elektron məktubların olması barədə xəbərdarlıq etməyə, məktublara cavab verməyə və s. imkan verir.
Bir müddət əvvəl "Bakı Telefon Rabitəsi" İB-nin baş direktoru Beytulla Hüseynovun dediyi kimi, nitqin tanınması sistemi elektron formaya keçirildikdən sonra "109" məlumat sisteminə birləşdiriləcək.
"Dilmanc" sisteminin "109" məlumat baza sistemi ilə birləşdirilməsi rabitə və informasiya texnologiyaları naziri Əli Abbasovun tapşırığına uyğun həyata keçiriləcək.
