Azərbaycan, Bakı, 5 sentyabr /Trend, müxbir H.Vəliyev/
Son ildə "Bakı Telefon Rabitəsi" İstehsalat Birliyinin şəbəkəsinə genişzolaqlı qoşulmaların sayı, ticarət provayderləri də daxil olmaqla, 86,4 faiz artaraq 110 min ədədə çatıb. Bu barədə Trend-ə bazar ertəsi İB-dən bildirilib.
Operator tərəfindən telekommunikasiya qovşaqlarında internet-servis-provayderlərinin ticarətinin inkişaf etdirilməsi üçün zəruri şərait yaradılıb. İlk növbədə, provayderlərin son istifadəçilərin ADSL xidmətinə qoşma əsnasında üzləşdikləri bürokratik maneələr aradan qaldırılıb.
Əvvəllər müştərinin qoşulmağı üçün operatora (azı bir həftə müddətində nəzərdən keçirilən) yazılı müraciəti tələb olunurdusa, hazırda elektron əməkdaşlıq sayəsində operatora müraciət daha operativ şəkildə baş verir ki, bu da son istifadəçinin qoşulma məsələsinin həllini iki günədək azaltmağa imkan verir.
Bununla yanaşı, provayderlər operatorun telekommunikasiya qovşaqlarında quraşdırılmış qurğularına giriş imkanı da əldə ediblər.
Nazirliyin statistikasına əsasən, Azərbaycanda internetin yayılma səviyyəsi 50 faiz təşkil edir ki, bunun da 30 faizi genişzolaqlı internet qoşulmalarının payına düşür.