Azərbaycan, Bakı, 21 oktyabr /Trend, müxbir H.Vəliyev/
Azırbaycan Rabitə və İnformasiya Texnologiyaları Nazirliyinin nümayəndə heyəti Beynəlxaq Telekommunikasiya İttifaqının "ITU Telecom World 2011" - Telekommunikasiya texnologiyaları, avadanlıqlar, xidmətlər ümumdünya konfransı və ixtisaslaşdırılmış sərgisində iştirak etmək üçün Cenevrəyə yola düşüb. Bu barədə Trend-ə cümə günü nazirliyin mətbuat xidmətinin rəhbəri Müşviq Əmirov bildirib.
"ITU Telecom World 2011" sərgi konfransı 24-27 oktyabrda keçiriləcək.
Əmirovun sözlərinə görə, nümayəndə heyətinə Azərbaycanın rabitə və informasiya texnologiyaları naziri Əli Abbasov başçılıq edir.
"Azərbaycan tədbirdə geniş formatda təmsil olunacaq. Nümayəndə heyətinə nazirliyin sahə strukturlarının, eləcə də telekommunikasiya və İT şirkətlərinin nümayəndələri daxildir. Nümayəndə heyətinin ümumi sayı 65 nəfərə çatır. Sərgi çərçivəsində milli pavilyon fəaliyyət göstərəcək və burada İKT sahəsində ən yeni texniki həllər nümayiş olunacaq", - Əmirov deyib.
Onun sözlərinə görə, sərgi çərçivəsində rabitə naziri bir sıra ölkələrin nümayəndələri ilə ikitərəfli görüşlər keçirəcək.
Müzakirələrin əsas mövzusu transmilli informasiya supermagistralının tikintisi layihəsi (TASIM), kosmik sənaye sahəsində layihə və s. kimi qlobal layihələr çərçivəsində əməkdaşlıq məsələləri olacaq.
"ITU Telecom World 2011" sərgisi dövlət sektoru, bütün dünyadan telekommunikasiya və informasiya texnologiyaları sektorunun beynəlxalq və yerli şirkətlərinin nümayəndələrini toplayan əhəmiyyətli hadisədir.
Tədbirdə nazirlərin, şirkət rəhbərlərinin, telekommunikasiya texnologiyaları sahəsində ekspertlərin iştirak edəcəyi gözlənilir.
Tədbirlər proqramında mərkəzi yeri innovasiyalar, biznes-diapazonlar, genişzolaqlı çıxış və kibertəhlükəsizlik kimi sahələrin əsas mövzuları üzrə bilik mübadiləsinə dair debatlar və müzakirələr nəzərdə tutulur.