Azərbaycan, Bakı, 15 yanvar /Trend, müxbir H.Vəliyev/
Yanvar ayının sonunadək Azərbaycanın mobil rabitə operatorlarının şəbəkələrində mobil nömrələrin daşınması xidməti (MNP) əlçatan olacaq. Bu barədə Trend-ə Rabitə və İnformasiya Texnologiyaları Nazirliyinin mətbuat katibi Müşfiq Əmirov deyib.
Onun sözlərinə görə, bu növ xidmətin göstərilməsinə hazırlıq operatorların səlahiyyətinə daxildir: "Onlar yaxın vaxtlarda bu servisi işə salmalıdırlar".
M.Əmirov qeyd edib ki, nazirlik mobil rabitə operatorlarının bu ay MNP ximətini tətbiq edəcəyini gözləyir.
MNP xidmətinin tətbiqi abonentlərə operatoru dəyişəcəyi təqdirdə öz telefon nömrələrini saxlamaq imkanı verəcək. Nömrənin daşınması operatorun ayırdığı prefikslə (050, 051, 055, 070 və 077) birlikdə abonent nömrəsinin tam miqrasiyasını nəzərdə tutur.
