Azərbaycan, Bakı, 3 mart /Trend, müxbir H.Vəliyev/
Azərbaycanın mobil rabitə operatoru "Azercell Telekom" MMC-nin yeni MFS (Mobile Finances Services) - mobil maliyyə xidməti ilin sonunadək implementasiya dövrü keçəcək. Bu barədə bazar ertəsi şirkətdən Trend-ə deyiblər.
MMC-dən bildiriblər ki, MFS-nin işə salınması iri kapital qoyuluşu tələb edir və operatorun bu zaman xidmətin işə salınmasından əldə edəcəyi gəlirlər o qədər də çox olmayacaq: "Xidmətin işə salınmasında əsas məqsəd mobil ödənişlərin həyata keçirilməsi zamanı son istifadəçiyə rahatlıq yaratmaqdır. Mobil operator bank xidmətləri göstərə bilmədiyi kimi, bank da operator xidməti göstərə bilməz. Belə olan halda söhbət həmin xidmət növünün göstərilməsi üçün bankın və operatorun səylərinin birləşdirilməsindən gedir. Hazırda işlər bütün mərhələlərdən keçib və yalnız layihənin implementasiyası qalıb".
MFS respublikada mal və xidmətlərin ödənişinə, Azərbaycan daxilində, eləcə də onun hüdudlarından kənarda pul köçürmələrinə imkan verir. Xidmətə qoşulmaq üçün Sim-kartların dəyişdirilməsi tələb olunmur.
